lei se sanga pe le cesycku zi'ene bau la lojban

ni'o recimo'o se sanga la daVID

i la turni cu gidva mi ne tai lo lanme i mi na claxu i vi loi srasu foldi cu vregau mi i vi loi surkai djacu cu gidva mi i fe le pruxi pe mi cu xrugau i gidva mi loi nunvu'e tadji tezu'e tu'a le cmene be ty i caji'a le nu mi litru le nunmro ctino foldi kei mi na terpa le nunpalci ki'u le nu do kansa mi i le gidgrana e le selvregrana vu'ope do cu kufygau mi i do nicygau ca'u mi le jubme mu'i le nu jivna lei fazbradi be mi i do gairgau le grasu le stedu be mi i le kabri pe mi clupa'e i le kamxau joi kamxe'o ku po'o cu jersi mi ca piro le nunji'e be mi i mi xabju le zdani be la turni ze'uku

ni'o revomo'o se sanga la daVID

i la turni cu cevni fi ge le terdi e ro se culno be ri gi le munje e ro xabju be ri iki'ubo ty ga'u loi xamsi cu cmufi'i gi'e ga'u loi rirxe cu zbefi'i i ma galkla le cmana pe la turni ije ma sanli vi le censa stuzi pe ty i seke jinsa bo xance je curve bo risna co tezu'enai nupre najenaike tcica nupre i se zabna fi la turni gi'e se pairxe'o le cevni co mrasabji i cedra lei sisku be ty be'o e lei cpedu be do be'o po'u la iaKOV i ko lafti doi bimvro lei stedu be do ije ko se lafti doi vitno vorme ija'ebo le se sinma noltru cu nerkla i ma se sinma noltru i la turni noi tsali je balvri i la turni noi balvri jamna i ko lafti doi bimvro lei stedu be do ije ko lafti doi vitno vorme ija'ebo le se sinma noltru cu nerkla i ma me le se sinma noltru i la turni ne loi jenmi cu se sinma noltru

ni'o panonomo'o ckire se sanga

i ko kixta'a la turni doi ro terdi xabju i ko gleki selfu la turni i ko cadzu ca'u ty gi'e geirsa'a i ko sanji le du'u la turni cu cevni i ty finti mi gi'e cevni mi no'u le pe ty natmi e le te lanme pe vi le nurma foldi i ko ckire klama lei bimvro pe ty gi'e balski klama lei ve bimvro pe ty i ko ckire ty gi'e te zabna le cmene be ty iki'ubo la turni cu xamgu ije le nunxe'o be ty cu vitno ije ca ro rorke'u cu se lacri

ni'o papavomo'o

i caki le nu nu'ige le bronai le misrygu'e nu'ugi le lanzu pe la iaKOV le fange se bangu natmi cu cliva kei la ie'uDAX cu censa i la iisra,EL cu se turni i le xamsi cu viska gi'e bajli'a i la iarDEN cu rixykla i lei cmana ne tai loi mirli cu dansu i lei cmama'a ne tai loi lanme i mu'i ma doi xamsi do bajli'a i doi iarDEN do rixykla i doi cmana do ne tai loi mirli cu dansu i doi cmama'a ne tai loi lanme i ca'u la turni mi no'u le terdi cu desku ca'u le cevni be la iaKOV be'o noi bixygau nu'ige le rokci le djacu lalxu nu'ugi le kunra le djacu flecu

ni'o papazemo'o

i ko balski la turni doi ro natmi i ko zanski ty doi ro se gugde iki'ubo carmi ri'i mi fa le nunxe'o be ty ije le kamje'u pe la turni cu vitno i ko balski la turni

ni'o parenomo'o galkla se sanga

i fe la turni ca le nu mi dunku kei fa mi kixta'a ije spuda i doi la turni ko nurgau le pruxi pe mi loi ticysku ctebi e loi jai tcica tance i dunda ma do ije jmina ma do doi jai tcica tance i tai lei kilsutra jesydanti pe lo balvri ge'u joi lo ricnretama sacki i oicai mi ze'u xabju i mi se zdani lei ginka pe la keDAR i ze'uku mi xabju co kansa le xebni be le nu panpi i mi panpi sarji i ku'i ca le nu mi tavla kei ra sarji le nu jamna

ni'o parepamo'o se sanga mu'i le nu galkla

mi galviska lei cmana fi fi ma fa le sidju be mi cu klama i te sidju mi fi la turni noi finti le tsani e le terdi i na curmi le nu desku fa lei tuple be do i na sipna fa le nurgau be do i sipna najenai nalsanji fa le nurgau be le bronai i la turni cu nurgau do i la turni cu ctino do gi'e pritu xance do i nu'ige ca le donri le solri nu'ugi ca le nicte le lunra cu na darxi do i la turni cu nurgau do ro palci i nurgau le pruxi pe do i la turni cu nurgau le nu do cliva e le nu do tolcliva cabi'oze'ebaku

ni'o pareremo'o galkla se sanga la daVID

i mi gleki ca le nu cusku fi mi fe lu e'u mi klama le zdani be la turni li'u i sanli fa lei jamfu be mi vi lei bimvro be fo do doi ierucale,im i la ierucale,im noi se zbasu zi'enoi taismi co jonsi'u kansa iki'ubo fe ibu galkla fa lei lanzu po'u lei lanzu pe la turni zi'epo'u lo sinxa pe le bronai mu'i le nu ckire le cmene be la turni iki'ubo va xabju fa lei nunpai stizu fa lei stizu pe le zdani pe la daVID i ko cpedu le nunsurla be la ierucale,im i ei surla fa lei prami be do i ai nunpanpi vi lei bitmu be fo do ije nunsurla vi lei zdani pe do i seva'u lei tunba be mi be'o e lei pendo be mi mi papkai tavla e'o do i seva'u le zdani be la turni noi cevni mi ku'o mi cpedu le nunxau be do

ni'o parecimo'o galkla se sanga

i fe do fa mi galviska doi xabju be le tsani i taigi nu'ige le selfu le turni nu'ugi le gunka le jitro cu pacna viska gi mi pacna viska la turni noi cevni mi ku'o gi'e pacna co zanru mi i ko zanru mi doi la turni i ko zanru mi iki'ubo mi culno co tolsi'a i dukse co culno fa le pruxi pe mi fe ge le ve ckasu be fo lei surla gi le nuntolsi'a be lei jgira

ni'o parexamo'o galkla se sanga

i ca le nu la turni cu xrugau la tsi,ON noi pinfu kei mi simsa loi senva icabo le moklu be mi cu culno le nunmi'a ije le tance be mi le geirselsanga icabo loi natmi ba cusku lu la turni cu balgau ti li'u i la turni cu balgau mi i mi ba gleki i ko xrugau doi la turni mi noi pinfu zi'ene tai lei rirxe pe vi le sudytu'a i loi sombo poi klaku ba crepu co geirsanga i du'igi cadzu je klaku co bevri le dakli be lei tsiju gi klama je geirsanga co bevri lei stani

ni'o pacizemo'o

i vi lei rirxe be la baVEL vuku mi zutse jeji'a klaku ca le nu morji fi la tsi,ON i fi le ricrsaliksu pe ne'i by fa mi dadgau lei jgita pe mi imu'ibo vi by cpedu fa lei se pinfu be mi lo se sanga joi nu lei jgita pe mi geirkai se zgike i lu ko sanga seva'u mi lo se sanga pe la tsi,ON li'u i lu a'unai mi sanga le se sanga pe la turni vi lo fange tumla li'u i ca le nu mi nalmorji fi do doi ierucale,im kei le pritu cu ei nalmorji i le tance cu ei snipa le moldru ca le nu mi na morji fi do kei ca le nu mi na selgeiraigau la ierucale,im lei se gleki be mi i ko morji doi la turni seva'u lei panzi be la eDOM fi le cedra pe la ierucale,im seva'u lei cusku be lu daspo je daspo le jicmu ji'a be by li'u i doi tolvifne tixnu be la baVEL i gleki fa le sfasa be do bei fo le ve sfasa poi do sfasa mi i gleki fa le jgari je maxre'o be lei cifpanzi be do be'o bei le rokci